Rektor virtual
qabulxonasi

Farg'ona politexnika instituti

O'zbekiston kelajagi uchun yetuk, barkamol va raqobatbardosh kadrlarni tayyorlash!
2013-Obod turmush yili

O’zbekistonda 2013 yil “Obod turmush yili” deb e’lon qilindi

 Prezident Islom Karimov o’zining O’zbekiston Respublikasi Konstitutsiyasining 20 yilligiga bag’ishlangan tantanali marosimdagi ma’ruzasida kirib kelayotgan yangi – 2013 yilga “Obod turmush yili” deb nom berish taklifi bilan chiqdi.

«Biz 2013 yilga shunday nom berar ekanmiz, ana shu yo’nalishda boshlagan ishlarimizni izchil davom ettirish, ularni yangi, yuksak bosqichga ko’tarishni asosiy maqsad deb bilamiz», — ta’kidladi davlatimiz rahbari.

Uning fikricha, shu munosabat bilan qabul qilinadigan davlat dasturida quyidagi ustuvor yo’nalishlarga alohida e’tibor qaratish maqsadga muvofiq, deb hisoblanadi: «Birinchidan, O’zbekistonimizda tinchlik-osoyishtalik va xavfsizlikni, fuqarolar va millatlararo ahillik va hamjihatlikni ko’z qorachig’idek saqlash va mustahkamlash bundan buyon ham eng muhim, hal qiluvchi vazifamiz bo’lib qolishi darkor. Albatta, bu masala bo’yicha mas’ul bo’lgan tegishli idoralar bor, kuch-qudratimiz ham yetarli. Lekin qachon yurt tinch va obod bo’ladi? Qachonki har qaysi uyda, har qaysi mahallada yashayotgan odam tinchlik va osudalikning qadriga yetib, uni mustahkamlashni, uni himoyalashni o’zining burchi, deb bilsa, tinchlik uchun kurashsagina bu maqsadga erishish mumkin»- deydi Islom Karimov.

Uning ta’kidlashicha, ikkinchidan, obod hayot degan tushuncha azal-azaldan xalqimizning ongu tafakkurida avvalambor farovonlik, to’kinchilik, mo’l-ko’lchilik, qut-baraka, bozorlarda arzonchilik ma’nosini o’zida mujassam etib keladi. SHuning uchun ham bugungi kunda xalq farovonligi tushunchasi Vatan ravnaqi va yurt tinchligi degan, biz uchun eng aziz va muqaddas bo’lgan qadriyatlar bilan birgalikda milliy g’oyamizning asosiy mazmun-mohiyatini tashkil etmoqda. Dasturni tayyorlashda aholi farovonligini, uning real daromadlarini oshirish, bandlik masalasini yechish, kichik biznes va xususiy tadbirkorlik, fermerlik harakatini yanada rivojlantirish, davlat tomonidan beriladigan aniq manzilli ijtimoiy yordam tizimini takomillashtirish kabi vazifalar e’tiborimiz markazida bo’lishi lozim. Bir so’z bilan aytganda, xalqimizning “Mehnatdan kelsa boylik – turmush bo’lar chiroylik” degan maqoli zamirida mujassam bo’lgan haqiqatni hayotimiz tarziga aylantirish yo’lida yangi yilda ham katta-katta ishlarni amalga oshirishimiz zarur.

«Uchinchidan, obod turmushning yana bir muhim sharti – bu inson salomatligini mustahkamlash bilan bog’liq ekanini barchamiz yaxshi tushunamiz. Haqiqatan ham, odamlarimiz qachon, qaerda bo’lmasin, duoga qo’l ochar ekan, avvalo, “Tani sog’lik, tinchlik-xotirjamlik bo’lsin, yurtimiz obod bo’lsin”, deb niyat qilishi bejiz emas, albatta. SHu bois xalqimizning salomatligini himoyalash, buning uchun sog’liqni saqlash tizimini eng zamonaviy davolash vositalari, texnika va texnologiyalar bilan ta’minlash, profilaktika, ya’ni kasalliklarning oldini olish ishlarini yanada kuchaytirish, bu sohada fidokorona mehnat qilayotgan tibbiyot xodimlarining mashaqqatli va mas’uliyatli mehnatini moddiy va ma’naviy rag’batlantirish masalalari biz uchun doimiy vazifa bo’lib qoladi. To’rtinchidan, xalqimizning hayot sifati va darajasini yuksaltirish, jumladan, yangi uy-joylar, zamonaviy yo’l va kommunikatsiya tarmoqlarini barpo etish, aholi punktlarini toza ichimlik suvi bilan ta’minlash, kommunal xizmat sohasidagi muammolarni yechish kabi dolzarb masalalar bo’yicha ham dasturda aniq chora-tadbirlar belgilanishi kerak. Beshinchidan, biz turmushimizni yanada obod qilish vazifasini oldimizga qo’yar ekanmiz, bir haqiqatni chuqur anglab olishimiz zarur. Ya’ni, hayotimizni obod qilishning muhim sharti – bu avvalo mahallani obod qilish demakdir. SHu borada mahalla idorasining, mahallada yashaydigan aholimizning o’zini o’zi boshqarish tizimini, kerak bo’lsa, ijtimoiy himoyalash tizimini yanada takomillashtirish, mahallaning ijtimoiy-iqtisodiy hayotimizdagi o’rni va ta’sirini yanada kuchaytirish, unga yangi huquq va vakolatlar berish bo’yicha ham keng jamoatchilik ishtirokida amaliy takliflar ishlab chiqish maqsadga muvofiqdir. Oltinchidan, hayotimizni yanada sog’lom va obod qilish, avvalo ayol zotining jamiyatimizdagi o’rni va nufuzini, ijtimoiy faolligini yanada oshirish, xotin-qizlarning turli jabha va yo’nalishlarda qilayotgan ishlarini munosib baholash, har qaysi xonadonda uy bekasi bo’lmish opa-singillarimizning og’irini yengil qilish asnosida turmushimizni farovon etish bilan uzviy va chambarchas bog’liqdir. Ana shu haqiqatni amalda qaror toptirish uchun bizning hali qiladigan ko’p ishlarimiz borligini unutmasligimizni istardim»,- o’z so’zini yakunladi  davlatimiz rahbari

 05:04, 8 Dekabr, 2012

-->